THE REPUBLIC OF THE UNION OF MYANMAR, ISLAMIC RELIGIOUS AFFAIRS COUNCIL ( HQ )

PDF File များ Download ပြုလုပ်နည်း Youtube Link

အီဒုလ်အဒ်ွဟာ၏ သဘောတရား (၁၂-၉-၁၉၅၁)

 
ကမ္ဘာအရပ်ရပ်ရှိ အစ္စလာမ်သာသနာဝင် မွတ်စ်လင်မ်တစ်မျိုးသားလုံးတို့သည် နှစ်ပေါင်း(၁၃၇၀)ကျော်မှစ၍ ယနေ့တိုင်တိုင် နှစ်စဉ်နှင့်အမျှ  “အီးဒ်”(ခေါ်) ဘာသာရေးပွဲတော်များကို 
အမြဲ ကျင်းပခဲ့ကြတယ်။ ယခုလည်း နက်ဖြန်ဆိုလျှင် ဗမာပြည်ရှိ ဗမာ့မွတ်စ်လင်မ်များနှင့် ကမ္ဘာအရပ်ရပ်ရှိ ကမ္ဘာ့မွတ်စ်လင်မ်များ တခမ်းတနား တပျော်တပါးကြီး ကျင်းပကြဦးမယ်။
 
မွတ်စ်လင်မ်များအဖို့ ပျော်ရွှင်ရန်အတွက် ရက်(၂)ရက်သတ်မှတ်ထားပါတယ်။ ပထမရက်ကိုတော့ “အီဒုလ်ဖိသ်ွရ်” လို့ခေါ်ပါတယ်။ ဒုတိယရက်ကို “အီဒုလ်အဒ်ွဟာ” လို့ခေါ်ပါတယ်။ 
နက်ဖြန် ကျင်းပမည့် “အီဒုလ်အဒ်ွဟာ”၏ သဘောတရားကို ယခု အနည်းငယ် အစီရင်ခံလိုပါတယ်။
 
နှစ်ပေါင်း(၄၀၀၀)ကျော်က တမန်တော်ကြီးတစ်ပါးပွင့်ခဲ့ပါတယ်။   အမည်မှာ “အိဗ်ရာဟီးမ်” (အ)ဖြစ်ပါတယ်။ ကြင်ရာတော်၏ အမည်မှာ  “ဟာဂျရဟ်” ၊  သားငယ်၏ အမည်မှာ “အိစ်မာအီလ်”(အ)ဖြစ်ပါတယ်။ 
ထိုတမန်တော်ကြီးနှင့်တကွ ဇနီးသည်၊ သားငယ်အားလုံးတို့ဟာ ဒီတိမာ၊ဒီရ၊အဓိဋ္ဌာန်ပါရမီရှင်များဖြစ်ကြပါတယ်။ နှလုံးရည်နှင့် ပြည့်ဝကြ၍ မိမိတို့၏ တာဝန်ဝတ္တရားများကို မတုန်မလှုပ် မသွေမဖည် တည်ကြည် ကြံ့ခိုင်စွာဖြင့် လိုက်နာဆောင်ရွက်လေ့ရှိကြပါတယ်။
 
တမန်တော်အိဗ်ရာဟီးမ်(အ)သခင်ဟာ အလ္လာဟ်အရှင်မြတ်၏အမိန့်တော်ကို ဦးထိပ်ရွက်ပန်ဆင်ရာမှာ မကြောက်မရွံ့ နောက်မတွန့်ဘဲ မီးပုံကိုလည်း ဆင်းပြခဲ့တယ်။ တိုင်းပြည်ကိုလည်း စွန့်ပြခဲ့တယ်။ ဒီတင်မက  အသက်တမျှ ချစ်မ၀တဲ့ သားကိုပင် အရှင့်အား ပူဇော်ရာ၌ လက်မတွန့်ခဲ့ပါ။ ထိုထိုသော ၀ိသေသဂုဏ်ပုဒ်တွေနဲ့ပြည့်စုံတဲ့အဓိဋ္ဌာန် ပါရမီရှင် တမန်တော်ကြီး၏ အတိတ်ရာဇ၀င်ကို ကမ္ဘာ့တစ်သက် တည်ရှိနေရန်အတွက် နိစ္စထာဝရ အလ္လာဟ်အရှင်မြတ်သည် အရေးဗီးယားတိုင်းပြည် မက္ကာဟ်မြို့တည်ရာဌာနမှာ ကျောင်းတော်ကို တည်ဆောက် စေတယ်။ ဆောက်လုပ်ပြီးစီးသည့်အခါ တမန်တော် အိဗ်ရာဟီးမ်သခင်အား ဤသို့ အမိန့်ဗျာဒိတ်ထုတ်ပြန် ချမှတ်တော်မူတယ်။
 
(အို - တမန်တော်အိဗ်ရာဟီးမ်)
 
ငါ၏ကျောင်းတော်သို့လူများလာ ရောက်ဖူးမျှော်ရန်အတွက် အသင်သည်ကြွေးကြော်ဖိတ်မန်လေကုန်။ 
 
သို့ ဖိတ်မန်လျှင် အလွန်ဝေးကွာသော ဒေသများမှ အချို့ကား ခြေလျင်၊ အချို့ကားကြုံလှီပိန်ချောက်သောတိရစ္ဆာန်များကို စီးနင်းပြီး သင့်ထံလာကြလိမ့်မည်။
 
ယင်းသို့လာကြပြီး မိမိတို့ အကျိုးခံစံရန် ဌာနအသီးသီးကို ရှုမျှော်ကြမည်။ မိမိတို့အား အပ်နှင်းထားသော (ကုရ်ဗာနီ) သားကောင်များကို (ဇဗဟ်) ပြုလုပ်ပြီး ပူဇော်ရာ၌ ငါ၏နာမံတော်များကို ရွတ်ဖတ် သရဇ္ဈာယ်ကြလိမ့်မည်။ သို့ရှိရာ အသင်တို့သည် ထိုသားကောင်များကို မိမိတို့ကိုယ်တိုင်လည်းစားသုံး၍ ဒုက္ခသည်၊ ဆင်းရဲသူ ဆင်းရဲသားများအားလည်း ဝေငှကျွေးမွေးကြရမည်။ မိမိတို့စိတ်နှလုံးအတွင်း၌ ငြိတွယ်နေသောအညစ်အကြေးများကိုလည်း သုတ်သင်ရှင်းလင်းကြရမည်။  ၄င်းနောက် မွန်မြတ်လှစွာသော ငါအရှင်၏ ကျောင်းတော်ကို (သွဝါးဖ်) လှည့်ပတ်ဖူးမျှော်ကြရမည်။
 
(ကုရ်အာန် - ၂၂း ၂၇၊ ၂၈၊ ၂၉)
 
 
ဤဗျာဒိတ်တော်အရ တမန်တော် အိဗ်ရာဟီးမ်(အ)သည် တောင်ထိပ်သို့တက်၍ ကမ္ဘာ့လူထုကြီးအား ဤသို့ကြွေးကြော်ခဲ့၏။
 
-------> 
 
အို - ကမ္ဘာသူ၊ ကမ္ဘာသားအပေါင်းတို့၊
 
အလ္လာဟ်အရှင်မြတ်သည် အသင်တို့အပေါ်၌ ဟဂ်ျပြုရန် အမိန့်တော်ထုတ်ပြန်ချမှတ်တော်မူချေပြီ။ 
 
အသင်တို့သည် အရှင့်ကျောင်းတော်ကို လာရောက်ဖူးမျှော်ကြကုန်လော့။
 
ယင်းသို့ တမန်တော်အိဗ်ရာဟီမ်(အ)သခင်ကြွေးကြော်ခဲ့သည်ကို အကြောင်းပြုပြီး ယနေ့ ကမ္ဘာအရပ်ရပ်ရှိ မွတ်စ်လင်မ်လူထုကြီးတစ်ရပ်လုံး ၀မ်းသာအားရ သောင်းသောင်းဖြဖြ နှစ်စဉ်နှင့်အမျှ မက္ကာဟ်မြို့သို့ ကုန်းတတန်၊ ရေတတန် သွားရောက်ပြီး အရှင့်ကျောင်းတော်ကိုဖူးမျှော်ကြတယ်။
 
အစ္စလာမ်သည် အရာရာတွင် တရားမျှတသော ညီညွတ်ရေးနှင့် ချစ်ကြည်ရေးကို အမြဲရှေးရှုပါတယ်။  
 
ဥပမာ - မွတ်စလင်မ်များသည် 
 
♥       တစ်နေ့လျှင် (၅)ကြိမ်၊ မိမိတို့ရပ်ကွက်ဆိုင်ရာ ဗလီများတွင် (ဆွလာသ်) ၀တ်ပြုကြပါတယ်။ 
 
♥       (၇) ရက်တစ်ခါ မြို့ပြဆိုင်ရာ သောကြာ ဗလီကြီး၌ စုရုံးပြီးဝတ်ပြုကြပါတယ်။ 
 
♥       တစ်နှစ် (၂)ခါ လူထုဝတ်ပြုရာဌာန၌ စုရုံးပြီး ၀တ်ပြုကြပါတယ်။
 
♥       နောက်ဆုံး တတ်ကုန်နိုင်လျှင် တစ်သက်တစ်ခါ မက္ကာဟ်မြို့ရှိအရှင့်ကျောင်းတော်သို့ သွားရောက်ပြီး ဟဂ်ျပြုကြပါတယ်။ ကုရ်ဗာနီပြုကြပါတယ်။
 
ဒါတွေဟာ မွတ်စ်လင်မ်များအဖို့
 
“နေ့စဉ်ညီလာခံ”၊ 
 
“ရက်သတ္တညီလာခံ”နှင့်
 
“ကမ္ဘာလုံးဆိုင်ရာ ကမ္ဘာ့မွတ်စ်လင်မ်ညီလာခံ”များဖြစ်ပါတယ်။ 
 
ဟဂ်ျပြုပုံကို အနည်းငယ် အစီရင်ခံပါရစေ ...
 
ကမ္ဘာ့အရပ်ရပ်ရှိ တတ်ကုန်နိုင်တဲ့ မွတ်စ်လင်မ်များဟာ ကိုယ်၊ နှုတ်၊နှလုံးသုံးပါးလုံးဖြင့် တစ်ဆူတည်းဖြစ်တော်မူသော အလ္လာဟ်အရှင်၏ကျောင်းတော်ကို ဖူးမျှော်ရန်အတွက် 
မက္ကာမြို့သို့ ခရီးထွက်ကြပါတယ်။  ဟဂ်ျ၏နယ်နိမိတ်သို့ရောက်သောအခါ ရေမိုးချိုးကြပါတယ်။ ရေမိုးချိုးပြီး အယုတ်အလတ် အမြတ် မရွေး ၊ ကြီးငယ် မခြား၊ ဓနရှင်နှင့် ဆင်းရဲသား၊ သမ္မတနှင့် သူတောင်းစား ၊ကျား/ မ -မရွေး၊ ဖြူနက်မခြား အားလုံးဖြူစင်သော ၀တ်ရုံတော်ကို ၀တ်ဆင်ကြပါတယ်။ သို့ဝတ်ဆင်ပြီး အရှင့်အား ၀တ်ပြုကြပါတယ်။ နောက် အရှင့်နာမံ တော်ဂုဏ်တော်များကို တသလျက် အရှင့် ကျောင်းတော်ရှိရာသို့ ဆက်လက် ခရီးထွက်ကြပါတယ်။ အရှင့်ကျောင်းတော်ကိုဖူးမျှော်ပြီးနောက်  ဇုလ်ဟိဂ်ျဂျဟ်(၉)ရက်နေ့တွင် သိန်းသန်း မကသော ကမ္ဘာ့မွတ်စလင်မ်လူထုကြီးသည် မက္ကာဟ်မြို့ အနီးရှိ (အရဖသ်)ကွင်းကြီး၌ အားကျဖွယ် တညီတညွတ်တည်း၊ တစ်စိတ် တစ်လက်တည်း၊ တစ်သဘောတည်း၊ တစ်သွေးတည်း၊ တစ်သံတည်း၊ တစ်ဆင်တည်းနှင့် တစ်ဆူတည်းသော အလ္လာဟ်အရှင်မြတ်၏ နာမံတော် ဂုဏ်တော်များကို တသကြတယ်။ မိမိနှင့် တကွ ဝေနေယျ သတ္တ၀ါ အားလုံးအတွက် ဆုတောင်း ပတ္ထနာပြုကြတယ်။ နောက်ပြီး ဆင်းရဲသူ ဆင်းရဲသားများအား စိတ်စေတနာ ဖြူစင်စွာဖြင့် ပေးကမ်း လှူဒါန်းကြတယ်။
 
 
ဤသို့ဟဂ်ျပြုခြင်းအားဖြင့် -
 
 
(၁) ကမ္ဘာ့အရပ်ရပ်ရှိမွတ်စ်လင်မ်များသည် တစ်ဦးကိုတစ်ဦး သိကြတယ်။ ရင်းနှီးမှုရကြတယ်။ ကမ္ဘာအရပ်ရပ်၏  ဗဟုသုတဆည်းပူးနိုင်ကြတယ်။ကူးလူးဆက်ဆံမှုတွေ အလိုလို          ပေါ်ပေါက်လာကြတယ်။
 
(၂) “ကမ္ဘာ့မွတ်စ်လင်မ် ညီလာခံသဘင်ကြီး”သည် အလိုလို ဖြစ်မှန်းမသိ နှစ်စဉ်နှင့်အမျှ ဖြစ်ပေါ်လာတယ်။
 
(၃) ရှေးတမန်တော်များ၏ သင်္ချိုင်းတော်များ၊မွန်မြတ်သော အဆောက်အဦများကို ဖူးမျှော်ရတယ်။
 
(၄) တမန်တော်အိဗ်ရာဟီးမ်(အ)သခင်၊ ကြင်ရာတော် ဟာဂျရဟ်သခင်မ၊သားတော်အိစ်မာအီလ်(အ)သခင်တို့နှင့်ပတ်သက်သည့် အဆောက်အဦများကိုဖူးမျှော်ရသည့်အခါ 
     သူတို့ကဲ့သို့ ဇွဲသတ္တိ၊ မသွေမဖည်သော စိတ်ဓာတ်၊ မှန်ကန်သော သစ္စာတရားများ ပွားများပါတယ်။
 
(၅) နောက်ဆုံး အရှင်မြတ်၏ မုက္ခပါဌ်တော်များကို တိကျ ပြတ်သားစွာ လိုက်နာဆောင်ရွက်ချင်တဲ့ဆန္ဒများတစ်ဖွားဖွားပေါ်ပေါက်လာပါတယ်။
 
 
ဒါကြောင့် ဗမာပြည်မှာရှိနေကြတဲ့ မွတ်စ်လင်မ်များလည်း အီးဒ်နေ့ကျလျှင်-
 
 
(၁) အလ္လာဟ်အရှင်မြတ်အား ကိုယ်၊ နှုတ်၊ နှလုံးသုံးပါးဖြင့် ခ၀ပ်ကိုးကွယ်ကြစမ်းပါ။
 
 
(၂) အချင်းချင်း ညီညွတ်ကြစမ်းပါ။ ချစ်ခင်ရင်းနှီးကြစမ်းပါ။
 
 
(၃) ဇွဲသတ္တိ၊ သံမဏိစိတ်ဓာတ်များကို မွေးမြူကြစမ်းပါ။
 
 
(၄) ဆင်းရဲသားကျောမွဲများအား တကယ် စိတ်စေတနာ ဖြူစင်စွာနှင့် လှူဒါန်းပေးကမ်းကြစမ်းပါ။
 
 
(၅) အခြား ဘာသာဝင် တိုင်းသားများနဲ့ ချစ်ကြည်ရင်းနှီးမှုတွေ လုပ်ကြစမ်းပါ။
 
 
(၆) မိမိတို့နေတဲ့ တိုင်းပြည်ငြိမ်းချမ်းရေး ၊ လွတ်လပ်ရေး တည်တံ့ခိုင်မြဲရေးနှင့် ကမ္ဘာ့ငြိမ်းချမ်းရေးတို့အတွက် ဆုမွန်များတောင်းကြပါစို့လို့ နိဂုံးချုပ်မေတ္တာရပ်ခံပါတယ်။
 
 
( ဃာဇီ  မုဟမ္မဒ်  ဟာရှင်မ် )
 
အထွေထွေအတွင်းရေးမှူး
 
ဗမာနိုင်ငံလုံးဆိုင်ရာ ဗမာမွတ်စ်လင်မ် အိုလမာအဖွဲ့ချုပ်
 
(၁၉၅၁)ခုနှစ် ၊ စက်တင်ဘာလ ၊ ( ၁၂ ) ရက်